தந்தானைத் துதிப்போமே (கும்மிப்பாடல் வரலாறு)

கும்மிப்பாடல் வரலாறு

காலையில் சுத்தாங்க திருச்சபை பற்றிய வரலாற்று பதிவு செய்து இருந்தேன்

*சுத்தாங்கத்து நற்சபையே- உன்னை*

என்ற பாடலின் பல்லவி வரலாற்றை நான் அறிந்து கொள்ள ஆசைப்பட்டேன்.

அனைவரும் தெரிந்து கொண்டால் நன்றாக இருக்கும் என நினைத்து தேடி பதிவு செய்துள்ளேன்.

இந்துப் பின்னணியிலிருந்து இயேசு கிறிஸ்துவை எற்றுக்கொண்ட குடும்பத்தின் மூன்று சகோதரர்களும் , தங்களை ஆண்டவரின் ஊழியத்திற்கு அர்ப்பணம் செய்து , திருச்சபையைக் கட்டும் போதகர்களாக , முழுநேரப்பணியில் ஈடுபட்டார்கள் என்பது வியக்கத் தக்கதல்லவா ?

இப்படிப்பட்ட குடும்பத்தின் மூத்த சகோதரராக விளங்கியவரே *வே . மாசிலாமணி ஐயராவார்.* அவரது இளைய தம்பி வே . சந்தியாகு ஐயரும் , சிறந்த பாடலாசிரியர் மற்றும் இசை வல்லுனர் என்பதை நாம் அறிவோம்.

மாசிலாமணி ஐயர் திருப்புவனம் என்ற சிற்றூரின் போதகராகப் பணியாற்றிய நாட்களில் , இந்தக் *கும்மிப்பாடலை* எழுதினார்.

ஆண்டவரின் புகழை , அனைவரும் அறியும் வண்ணம் , அவரைப் போற்றிப்பாட , திருச்சபையாகிய கன்னியரை அழைப்பதாக , இப்பாடலை மாசிலாமணி எழுதியிருக்கிறார்.

சிறந்த வயலின் வித்துவானாகிய மாசிலாமணி , தனது பாடல் மற்றும் இசைத் தாலந்துகளை , நற்செய்திப் பணிக்கென முழுவதுமாக அர்ப்பணித்துச் செயல்பட்டார்.

திருவண்ணாமலையின் வாரச் சந்தை நாட்களில் , மாசிலாமணி தன் நண்பர்களுடன் அங்கு சென்று இசைக்கச்சேரி நடத்துவார்.

அப்போது அவரின் பாடலையும் இசையையும் கேட்க , சந்தைக்கு வந்த மக்கள் கூட்டமாகக் கூடுவார்கள்.

அவர்களுக்கு நற்செய்தியைப் பக்குவமாகப் பாடல்கள் வழியாக அவர் எடுத்துக்கூறி , ஆண்டவரின் அன்பால் அவர்களைக் கவர்ந்திடுவார்.

கிறிஸ்தவ சமுதாயத்திற்கு , பண்டிகைகளின் மகிழ்ச்சியைத் கூட்டித் தரும் பிரபலமான பாடல்களாக விளங்குகின்றன.

கருத்துச் செறிவுடன் விளங்கும் இப்பாடல்கள் , நூற்றாண்டு காலமாய் , திருச்சபை மக்களனைவரும் விரும்பிப் பாடும் பாடல்களாகத் திகழ்கின்றன.

இப்பாடல்கள் பிரபலமாவதற்கு , அவர் அமைத்த சிறந்த இசைப்பண்களும் காரணமாகும்.

இசையும் பாடலின் சொல்லடுக்கும் , அருமையாக இணைந்து வருவதை , " ஆனந்தமே ஜெயா ஜெயா " என்ற பாடலைப் பாடி மகிழ்வோர் நன்கு அறிவர்.

தந்தானைத் துதிப்போமே

Thanthanai Thuthipome
தந்தானைத் துதிப்போமே – திருச்
சபையாரே கவி – பாடிப்பாடி
தந்தானைத் துதிப்போமே
விந்தையாய் நமக்கனந்தனந்தமான
விள்ளற்கரியதோர் நன்மை மிக மிக (2) – தந்தானை

1. ஒய்யாரத்துச் சீயோனே – நீயும்
மெய்யாகக் களிகூர்ந்து நேர்ந்து
ஒய்யாரத்துச் சீயோனே
ஐயனேசுக்குனின் கையைக் கூப்பித் துதி
செய்குவையே மகிழ் கொள்ளுவையே நாமும் (2) – தந்தானை

2. கண்ணாரக் களித்தாயே – நன்மைக்
காட்சியைக் கண்டு ருசித்துப் புசித்து
கண்ணாரக் களித்தாயே
எண்ணுக்கடங்காத எத்தனையோ நன்மை
இன்னுமுன்மேற் சோனா மாரிபோற் பெய்துமே (2) – தந்தானை

3. சுத்தாங்கத்து நற்சபையே – உனை
முற்றாய்க் கொள்ளவே அலைந்து திரிந்து
சுத்தாங்கத்து நற்சபையே
சத்துக் குலைந்துனைச் சக்தியாக்கத் தம்மின்
ரத்தத்தைச் சிந்தி எடுத்தே உயிர் வரம் (2) – தந்தானை

4. தூரம் திரிந்த சீயோனே – உனைத்
தூக்கியெடுத்துக் கரத்தினிலேந்தி
தூரம் திரிந்த சீயோனே
ஆரங்கள் பூட்டி அலங்கரித்து நின்னை
அத்தன் மணவாட்டி யாக்கினது என்னை! (2) – தந்தானை

5. சிங்காரக் கன்னிமாரே – உம்
அலங்காரக் கும்மி அடித்துப் படித்து
சிங்காரக் கன்னிமாரே
மங்காத உம் மணவாளன் இயேசுதனை
வாழ்த்தி வாழ்த்தி ஏத்திப் பணிந்திடும் (2) – தந்தானை

------------------------------------------------------------
👉🏻 *திசை தெரியாமல் திகைக்காதிருக்க திருச்சபை வரலாறு தெரிய வேண்டும்.*

📜வரலாற்று புத்தகத்திலிருந்து திரட்டியது ...

🙋🏻‍♂ *Manna Selvakumar*
📧mannaselvakumar@gmail.com
------------------------------------------------------------